史達寧係「熱刺殺手」　翻身機會來了

阿仙奴將於周四(16日)凌晨英超主場對熱刺，球隊遇上大「傷鋒」，2位鋒線主力布卡約沙卡、加比爾捷西斯先後受傷，無緣今場「倫敦打吡」，大後備史達寧有望擔正。呢位30歲翼鋒職業生涯25次鬥熱刺，射入8球及5次助攻，堪稱「熱刺殺手」，可能成為兵工廠救星。

阿仙奴主帥阿迪達上年夏天向車路士借用史達寧，原本對佢寄予厚望，但呢位英格蘭球星狀態持續低迷，各項賽事僅上陣12次入1球，大部分比賽後備上陣或者踢盃賽，英超僅6次披甲，只有2次踢正選，並冇波入。

阿仙奴上場英足盃對曼聯，史達寧入替受傷嘅加比爾捷西斯，如無意外，佢今場英超將會以正選身份上陣。事實上，史達寧以往對熱刺，往往有出色表現，合共射入8球，多過兵工廠現時隊內任何球員，甚至多過布卡約沙卡、加比爾捷西斯、夏維斯對熱刺入波嘅總和。

由於史達寧唔想重返車路士，如果要說服阿仙奴今夏買斷佢，今仗正係表現身價博翻身嘅最好機會。