富克洛重傷長抖3個月　樸達好頭痕

韋斯咸上場英足盃由新帥樸達首次領軍下，不敵阿士東維拉之餘，仲有前鋒富克洛傷出，呢位31歲德國國腳經過檢查後，證實腿筋撕裂，預料需要休息3個月，令成績低迷嘅韋斯咸雪上加霜。

富克洛上仗踢咗15分鐘就受傷退下火線，經過掃瞄檢查後，發現佢腿筋撕裂，領隊樸達話：「當時見到富克洛咁樣拉傷，就知道情況嚴重，我哋都好擔心，需要考慮簽入前鋒。」富克洛上年8月由多蒙特加盟韋斯咸後，僅上陣11次入2球及1次助攻，並已經第2次受重傷，佢曾於上年9月整傷跟腱，缺陣近3個月，直至上月初先至復出，估唔到現時又要長抖。

韋斯咸另1位前鋒米查利安東尼奧上月遇車禍受重傷，提早收咧，依家冇埋富克洛，樸達肯定好頭痕，翼鋒森馬維爾上仗亦受傷，幸好傷勢比較輕微。