曼城崩潰謎題解開　哥迪奧拿離婚

曼城自哥迪奧拿續約後成績持續向下，聯賽跌出前4，球隊走樣原因眾說紛紜，直至日前謎題似乎揭盅，就係哥迪奧拿最近離婚，據報哥迪奧拿與同行30年嘅妻子Cristina Serra上月達成分居協議，結束婚姻關係。

原來哥迪奧拿同Serra已經分開生活5年多，Serra同細女於2018年離開曼徹斯特，搬返巴塞隆拿居住，哥迪奧拿就留喺曼徹斯特生活，只能定期到巴塞慰妻，不過兩人最後一次公開露面，要數到去年7月觀看溫布頓網賽。

53歲嘅哥迪奧拿不止一次暗示自己教埋今季就離開曼城，不過去年10月突然宣布同曼城續約留隊，似乎續約同離婚可能有密切關係，而曼城表現走樣呢段時間，亦同哥迪奧拿離婚時間吻合，哥迪奧拿更曾經在歐聯3比3賽和飛燕諾後自殘，滿頭爪痕，鼻樑受傷。

1994年哥迪奧拿球員時代已經同Serra拍拖，兩人共有3名子女，2014年在巴塞成婚，妻子Serra係記者、作家及時裝達人。