高普返新工首見傳媒：曼城被罰我會開P慶祝

前利物浦領隊高普喺今年1月1日，正式成為紅牛集團足球主管，負責集團旗下6間球會發展。返新工嘅高普日前首度公開見傳媒，期間表示如果曼城嘅財務違規官司被判有罪，佢承諾會搞個派對慶祝！

高普執教嘅利物浦，喺18/19同21/22球季都被曼城壓倒拎亞軍，有傳曼城被英足總檢控115條財務違規官司一旦罪成，冠軍有機會被褫奪。依家住喺西班牙馬略卡島嘅高普表示：「我依家要四圍飛，所以留喺馬略卡島時間唔多，不過如果真係發生(曼城罪成)，我保證會喺屋企花園搞個慶祝派對，準備埋啤酒，想參加嘅人買張去馬略卡島嘅機票就可以嚟！」

高普亦講到舊主利物浦嘅情況，尤其係穆罕默德沙拿、華基爾雲迪積克同阿歷山大阿諾特續約問題，高普就話：「我開心我已經唔係負責人，唔需要就呢個情況每星期被追問，我當然想佢哋3個續約，不過佢哋冇同我透露過發生咩事。當華基爾雲迪積克41歲至44歲，我相信佢會想去紐約踢波.....我哋(紐約紅牛)會歡迎佢加盟！」