【官宣】維拉簽當耶爾馬倫　杜蘭走得？

近2年英超躋身勁旅行列嘅阿士東維拉，冬季轉會窗繼續展現雄心壯志，周二(14日)宣布由多蒙特簽入荷蘭國腳當耶爾馬倫，轉會費2,600萬歐元。隨住維拉再簽入星級前鋒，有傳韋斯咸、巴黎聖日耳門等即刻出手搶祖漢杜蘭，但維拉唔會輕易放人。

25歲嘅當耶爾馬倫喺2015年至2017年間，曾效力阿仙奴青年軍，今次重返英超同維拉簽約到2029年後表示：「喺英超比賽係夢想成真，重返英國我好開心，維拉嘅發展計劃同目標吸引到我，今季仲有好多重要比賽，我好興奮！」

維拉已有奧尼屈堅斯、祖漢杜蘭等前鋒，有傳維拉可能會賣祖漢杜蘭，韋斯咸同巴黎聖日耳門甚至已提出收購，不過《The Athletic》指維拉已拒絕其他球會斟介，而且至少要6,000萬鎊以上轉會費先會令佢哋作出考慮。