麥湯米尼做說客　拿玻里力斟加拿祖

近期盛傳曼聯有意出售2位新星阿歷真度加拿祖、明奈，立即引起各大球會注意，除咗車路士想簽入明奈之外，意甲榜首拿玻里睇中阿歷真度加拿祖，並派出前紅魔鬼中場麥湯米尼做說客，邀請呢位20歲阿根廷國腳加盟。

根據意大利傳媒《ArenaNapoli》爆料，拿玻里出售基華拉斯基利亞畀巴黎聖日耳門，獲得7,000萬歐元(約5.6億港元)轉會費收入，有充裕資金收購新翼鋒，填補呢位格魯吉亞國腳離隊後嘅空缺，教練干地指名要求簽入阿歷真度加拿祖，並願意出價5,000萬鎊(約4.75億港元)。據悉拿玻里管理層已經同加拿祖嘅經理人接觸，甚至搵埋麥湯米尼遊說呢位前曼聯隊友一齊拍住上。

曼聯由新帥魯賓艾摩廉執教後，加拿祖不獲重用，往往擔任後備，角色似昔日嘅麥湯米尼，「麥湯」今季加盟拿玻里立即成為主力，佢嘅經歷無疑係說服加拿祖「脫魔」最有力理由。