紅魔DNA有市場　小保加簽安達靴里拉

根據「轉會權威」記者羅曼諾(Fabrizio Romano)爆料，阿根廷勁旅小保加已經同畢爾包達成協議，簽入呢支西甲球隊嘅中場安達靴里拉，雙方將簽1年合約，並有權續約1年，意味繼卡雲尼之後，再有1位前曼聯球星加盟小保加。

現年35歲嘅安達靴里拉曾於2014至19年效力曼聯，其後轉投巴黎聖日耳門，2022年夏天重返畢爾包。安達靴里拉年紀漸大，狀態難免下滑，今季西甲僅上陣8次，並冇入波，佢為咗把握剩餘無幾嘅球員生涯，爭取更多上陣機會，決定離隊，並獲得小保加邀請加盟，等佢完成體測後，就會正式簽約。

小保加2023年夏天簽入卡雲尼，呢位37歲烏拉圭前鋒有出色表現，上年上陣39場入20球，證明歐洲球壇老將去阿甲搵食，綽綽有餘，安達靴里拉或者可以搵到事業第二春。