截胡！阿仙奴「預訂」蘇比文迪夏天加盟

西班牙中場蘇比文迪係球壇搶手貨，上年利物浦幾乎成功簽人，不過蘇比文迪最後關頭轉軚留效皇家蘇斯達。近日多個可靠媒體爆料，阿仙奴即將「截胡」，已接近完成收購蘇比文迪，今個夏天就會啟動佢合約內6,000萬歐元買斷條款。

25歲嘅蘇比文迪係西班牙上年贏歐國盃冠軍功臣，曼城、利物浦、巴塞隆拿同拜仁慕尼黑都對佢虎視眈眈，不過據Fabrizio Romano等報道，阿仙奴喺領隊阿迪達大力推動下，已同蘇比文迪傾掂轉會條件，並會啟動佢合約內買斷條款，成功「預訂」呢位防中。

阿仙奴依家兩名中場湯馬士柏迪同佐真奴費路，今個夏天將會回復自由身，所以急需物色頂級中場替補，而蘇比文迪喺阿仙奴亦唔會孤單，事關佢同米基爾馬連奴、馬田奧迪加特都係昔日皇蘇隊友，3人合組中場會有化學作用。