紐卡素9連勝　伊沙克破舒利亞入球紀錄

近期狀態勇達巔峰嘅紐卡素，周四(16日)凌晨英超主場3比0大勝狼隊，各項賽事9連勝追平球會紀錄，瑞典前鋒阿歷山大伊沙克踢到着晒火，連續8場聯賽入波，破埋紐卡素傳奇前鋒舒利亞嘅紀錄，認真威水！

狼隊今場表現搏命，不過就被伊沙克一人打爆，34分鐘伊沙克禁區頂起腳省中人彈入，57分鐘佢喺禁區內無人看管輕鬆射成2比0，呢位瑞典射手74分鐘轉做助攻，橫傳畀安東尼哥頓埋齋。紐卡素各項賽事9連勝，追平奇雲基瑾(1994年)同賓尼迪斯(2006年)時代創下嘅連勝紀錄。

「最佳男主角」伊沙克今場2射1傳，連續8場聯賽取得入波(共11球)，打破舒利亞保持嘅連續7場聯賽入波球會紀錄，喺英超歷史上，亦只係輸畀占美華迪(連續11場)同雲尼斯達萊(連續10場)。伊沙克賽後表示：「紀錄係要等掛靴之後先去享受，我依家每場只有一個諗法，就係入波去幫助球隊。」