愛華頓又食蛋　莫耶斯回歸「咪一樣」

上星期獲莫耶斯回巢執教嘅愛華頓，周四(16日)凌晨英超繼續輸波兼食蛋，主場0比1不敵阿士東維拉，令莫耶斯「二次地標」面目無光。莫耶斯賽後表示冇辦法即刻扭轉頹勢，並要求球會盡快增兵。

莫耶斯喺2002年首度執教愛華頓，相隔23年後第2次「地標」，球員雖然戰意高昂，但入球能力依然疲弱，更喺51分鐘被奧尼屈堅斯攻入全場唯一入球，主場慘輸0比1，近11場聯賽第9次冇波入。

莫耶斯賽後表示：「我知道教愛華頓係好大挑戰，今場又入唔到波，戴治留低一班態度好好嘅球員，我需要喺依家嘅人腳再增添幫手，我唔係魔術師，冇辦法立即令球隊脫胎換骨。」

更慘嘅係，由於車路士借用前鋒布查重傷，據報將會提前「退貨」，愛華頓希望今個月可以引入一名前鋒同一名翼鋒，據報目標係李斯特城外借史篤城嘅前鋒簡隆，轉會費約1,000萬鎊。