國米聯賽6連勝斷纜　益咗拿玻里

周四(16日)凌晨意甲爆出冷門，上季冠軍國際米蘭主場出擊，被博洛尼亞逼和2比2，聯賽6連勝斷纜，落後榜首拿玻里3分，雖然國米踢少1場，但失分之後，已經冇優勢可言。

博洛尼亞反客為主，開波初段採取主動，中場尼高拉摩路遠射，被國米門將恩尼森馬撲到再中柱。踢到15分鐘，辛迪亞高卡斯迪路凌空抽射，省中人稍為改變方向入網，為博洛尼亞打開紀錄。

不過，國際米蘭好快扳平，費達歷高迪馬高起腳被門將史高盧比斯撲出，杜費斯補射入空門。戰至上半場補時，費達歷高迪馬高左路傳中，拿達路馬天尼斯近門射入為國際米蘭反超前2比1。

換邊之後，博洛尼亞有運行，中場艾美賀姆射門，又係省中對手改變方向入網逼和2比2，國際米蘭1.35倍主W都開唔出。賽後國米主帥施蒙尼恩沙基表示，球隊創造大量入波機會，但未能把握，賽果令人失望。事實上，國米曾有機會絕殺對手，但後備上陣嘅泰尼米門前失機，白白痛失2分。