耶馬Solo率巴塞大勝　下季改着10號

近期火力全開嘅巴塞隆拿，周四(16日)凌晨西盃5比1大炒貝迪斯入8強，拉明耶馬有1入波同1助攻，玩轉貝迪斯防線技驚四座，據報呢位17歲天才下季將改着10號波衫，正式成為「美斯接班人」。

巴塞喺西超盃5比2大勝皇馬奪冠後，今場迎戰貝迪斯繼續大開殺戒，加維、祖利斯古迪、拉芬夏比洛尼、費倫托利斯同拉明耶馬分別建功，助巴塞5比1大勝晉級。

拉明耶馬對貝迪斯精華：https://x.com/i/status/1879650470236721443　

拉明耶馬今場完全摧毀貝迪斯防線，教練費歷克賽後表示：「加維話耶馬係美斯之後嘅最佳球員，我都同意，佢不斷喺大戰入面展示自己嘅才華，不過佢就好年輕，我哋要好好照顧佢。」

據西班牙著名記者Jota Jordi爆料，巴塞已決定下季畀19號嘅耶馬改着10號，由於依家10號主人安素法迪幾乎肯定離隊，耶馬繼任10號係順理成章。