【官宣】葉士域治盡地一煲　高價收購維拉新星救亡

葉士域治現時排英超尾四，深受降班威脅，會方為保住英超席位，不惜工本豪花2,000萬鎊(約1.9億港元)收購阿士東維拉22歲翼鋒菲洛真救亡，雙方簽約4年半。不過，呢位英格蘭新星已經超過1個月冇上陣，狀態成疑，能否即時為葉士域治作出貢獻，實屬疑問。

菲洛真出身於維拉青訓系統，出道後大部分時間被外借，2023年夏天正式離隊轉投侯城，但僅過1季就回巢維拉，佢今季英超上陣11次，並冇入波，最大問題係佢自上月初對修咸頓後，就再冇上陣，葉士域治今次高價收購菲洛真，備受外界質疑。

菲洛真加盟葉士域治後話：「我已急不及待想參加比賽，我喜歡盤球突破創造入球，好期待協助葉士域治交出好成績。」葉士域治陷入地獄賽程，未來3場英超對手包括白禮頓、曼城、利物浦，2月1日晚主場對修咸頓，屬於護級生死戰。