曼聯「新麥湯」上位　可以放心賣明奈

曼聯上場英足盃淘汰阿仙奴，21歲防守中場杜比高利亞後備入替明奈，表現備受好評，領隊魯賓艾摩廉表示，將會徵召呢位新星出戰周五(17日)凌晨英超主場對修咸頓，輿論認為艾摩廉有心栽培杜比高利亞，為出售明奈做準備。

杜比高利亞季初有份踢社區盾對曼城，其後英超主場對利物浦，下半場一開波就入替表現欠佳嘅卡斯米路，英聯盃對班士利，更加擔任正選踢足全場。

相隔近5個月，杜比高利亞再次為曼聯一隊披甲，而且對手係阿仙奴，佢交足功臣。艾摩廉對呢位新星讚不絕口：「杜比近期操練表現出色，佢好願意學習，並有好大進步，嚟緊對修咸頓，佢令我有更多選擇。」

杜比高利亞踢法瞻前顧後，被指似今季離隊嘅麥湯米尼，近期盛傳明奈續約談判，要求加薪10倍至20萬鎊周薪(約190萬港元)，車路士趁機挖角，艾摩廉高調讚揚杜比高利亞，似乎想向明奈發出警告，隊內有人可以取代佢。