巴西天才後腳入波 皇馬加時淘汰切爾達
周五(17日)凌晨西盃，皇家馬德里主場對切爾達峰迴路轉，皇馬喺領先2比0優勢下，尾段連失2球令比賽「加時」，好在巴西新星安迪歷喺加時戰發威，包括用後腳巧妙入波，帶領皇馬贏5比2晉級8強。
皇馬今場順風順水，基利安麥巴比同雲尼斯奧斯祖利亞各入1粒領先2球，點知83分鐘被莊拿芬班巴破蛋後，90分鐘再輸12碼，馬高斯阿朗素操刀為切爾達追平2比2，比賽要進入加時。
後備入替麥巴比嘅安迪歷，加時階段做好戲，108分鐘禁區頂轟入世界波，4分鐘後費達歷高華維迪又轟多一粒金球，119分鐘安迪歷禁區亂軍中背對龍門，巧妙用後腳射入，連入2球率皇馬晉級。
安迪歷賽後表示：「我將2個入波獻畀魯迪格，佢知道我哋每日有幾努力練習，魯迪格從來唔會讚我，呢件唔係壞事，佢會同我講應該點做。魯迪格係個好人，所以將入球獻畀佢。」