拉舒福特同殺人犯合照　發聲明主動「投案」

曼聯喺英超對修咸頓前，再次落選大軍名單嘅拉舒福特就發出聲明，不過內容係關於自己私事。「福仔」自爆被小報記者威脅，話會公開佢同殺人犯嘅合照，所以佢決定先下手為強，主動解釋同嗰位「殺人犯」並非朋友，而且並唔認識。

拉舒福特喺聲明入面表示：「有小報記者今日同我講，話準備公開一張我上年同一個饒舌歌手合照。我要澄清我從未見過張相，同相中人唔認識亦唔係朋友，同大部份球員一樣，如果有人想同我合照，我唔會拒絕，亦冇可能向每個合照嘅人起底。我呼籲小報唔好咁關注我，將時間用喺關注英國持刀犯案嘅問題上面。我向Jimmy Mizen家人送上深切慰問。」

拉舒福特最後提到Jimmy Mizen，間接證實「相中人」身份係饒舌歌手Jake Fahri，Fahri喺2009年被控謀殺一名16歲學生，罪成後坐監14年，2023年獲釋。Fahri放監後以蒙面造型兼用藝名TEN出歌，最近被踢爆「黑歷史」後，發現佢嘅歌曲入面有唔少隱喻當年殺人嘅歌詞，引起極大回響，所以拉舒福特亦要速速割席。