瘋狂！曼城斟意大利鐵閘　冬季花近2億鎊

今季成績大幅滑落嘅曼城，為盡快振作斥巨資擴軍，冬季轉會窗瘋狂買人，傾掂數收購馬莫殊、卡胡辛洛夫同域陀利爾斯後，轉會權威Fabrizio Romano踢爆曼城正斟介祖雲達斯守將安達亞甘比亞素，令1月轉會花費直逼2億鎊！

曼城今個月積極買人，據報同法蘭克福傾掂5,900萬鎊收購埃及前鋒馬莫殊，加上之前傾掂嘅卡胡辛洛夫(3,350萬鎊)同域陀利爾斯(2,940萬鎊)，冬天買人花費已超過1.2億鎊。勢估唔到曼城仲未收手，Romano爆料：「曼城正接同祖雲達斯商討安達亞甘比亞素轉會，同球員初步會談好正面，合約係5+1年，兩間球會亦會討論轉會時間問題，可能係1月或者6月。」

據報祖雲達斯要求收取約6,000萬鎊轉會費，現年24歲嘅安達亞甘比亞素司職左閘，亦可以勝任右閘同翼衞，已代表意大利國家隊上陣13次，由於祖雲達斯最近簽入左閘艾拔圖哥斯達，放走安達亞甘比亞素機會大大提高。