沙特高官最大暗示　希拉爾再搶沙拿

穆罕默德沙拿同利物浦續約仍然拉鋸，距離夏天約滿時間無多，據報沙特豪門希拉爾再次出手搶人，並已同沙拿嘅代表進行接洽。沙特體育界大人物Al-alshikh，日前更喺社交網發布沙拿着上希拉爾波衫嘅P圖，被視為收購沙拿嘅最大暗示！

近日沙特媒體瘋傳希拉爾出手斟介沙拿，希望用佢代替巴西球星尼馬嘅位置，作為沙特公共娛樂管理局(GEA)主席嘅Al-alshikh，係沙特近年投放無限資金發展體育項目嘅話事人，佢就喺Facebook向1,500萬個粉絲，貼出沙拿着希拉爾波衫嘅改圖。Al-alshikh早前曾表示沙拿上年已幾乎加盟希拉爾：「沙拿上年已準備同意轉會，但利物浦最後關頭改變主意。」

法國權威《隊報》同樣報道，希拉爾已經同沙拿嘅代表進行接觸，傳聞會開出價值6,500萬鎊嘅2年合約。沙拿近期多次表示，同利物浦續約談判「冇進展」、「仲差好遠」，令球迷擔心呢位埃及前鋒將會喺夏天自由身離隊。