阿仙奴小朋友上位　杜曹點兵預埋佢

阿仙奴今季重點栽培兩名英格蘭新星，原本進攻中場尼華尼利最受睇好，不過18歲左閘利維斯史基利更快企穩陣腳，近期連串出色表現，據報獲英格蘭新帥杜曹賞識，有望喺3月份點兵獲國家隊徵召。

利維斯史基利今季已15次為阿仙奴上陣，上場對熱刺成為法比加斯(2005年)後，首個喺北倫敦打吡踢正選嘅18歲球員，而且完全凍結熱刺核心古路施夫斯基，令看台上睇波嘅杜曹都非常欣賞。

迪格蘭賴斯表示：「史基利只得18歲，有呢種表現真係難以置信，佢落到場係完全無所畏懼。」史基利依家壓倒辛真高、基蘭泰亞尼同積及基奧柯3名國腳做正選，足證領隊阿迪達對佢充滿信心。

據英國《每日電訊報》報道，杜曹計劃喺首份國家隊名單召入史基利，考慮到英格蘭左閘人才凋零，勞基梳爾長期受傷，利維斯賀爾、利維高維爾等新人亦表現平平，史基利入選並唔令人意外。