雲尼亞里「急救成功」　羅馬主場6連勝

周六(18日)凌晨意甲，羅馬主場以3比1擊敗熱拿亞，呢支首都球隊自上年11月邀請名帥雲尼亞里出山執教後，表現愈戰愈勇，獲得主場6連勝。不過「雲爺爺」重申，今季結束後將再次退休，羅馬管理層需要物色接班人。

羅馬今仗主動搶攻，開賽初段有保羅戴巴拿主射罰球中楣彈出，踢到25分鐘，羅馬中場羅倫素柏歷堅尼近門起腳，被門將利亞尼撲出，仲有多夫碧補射入網打開紀錄。熱拿亞靠角球攻勢，由中場柏迪斯奧馬仙尼射入扳平。

換邊之後，羅馬控制戰局，60分鐘保羅戴巴拿回傳，艾沙拉維射入再次領先，加上熱亞拿門將利亞尼擺烏龍，以3比1勝出，各項賽事主場6連勝，亦係自2023年11月後，首次聯賽主場4連勝。不過，羅馬贏波亦付出代價，羅倫素柏歷堅尼受傷，未知需要抖幾耐。

羅馬喺雲尼亞里率領下全面復甦，會方希望挽留呢位73歲老帥，但佢強調唔會改變今季結束後離任決定。羅馬今季炒咗2位教練迪羅斯、祖歷，可見呢個「三煞位」非常難坐，會方要搵1位合適主帥接替雲尼亞里，並非易事。