卡馬雲加變「玻璃腳」　又受傷抖3周

皇馬中場卡馬雲加今季變成「玻璃腳」，頻頻受傷，呢位22歲法國國腳踢完上場西班牙盃之後，再次受傷，估計需要休息3星期，除咗將缺陣周日(19日)晚西甲主場對拉斯彭馬斯之外，亦無緣下周四(23日)凌晨歐聯主場對薩爾斯堡。

卡馬雲加上仗70分鐘後備上陣，賽後發現大腿肌肉受傷，未來3星期賽事都唔需要預佢。卡馬雲加曾於季初因為膝傷抖咗1個半月，上年年尾因為整傷腿筋，休息2星期，依家輪到肌肉受傷，實在非常黑仔。皇馬醫療團隊正在全力協助卡馬雲加康復，希望幫助佢趕及2月9日復出踢「馬德里打吡」主場對馬體會。

另外，皇馬收到好消息，因傷缺陣超過1年半嘅中堅阿拉巴，有望復出踢今輪西甲對拉斯彭馬斯，可以舒緩防線人腳不足問題。