維拉踢守勢波 阿仙奴傷鋒殘兵獻「細」
英超前列大戰，阿仙奴喺酋長球場迎擊阿士東維拉，「兵工廠」依家大鬧前鋒荒，近期入波相當吃力，對住硬淨嘅阿士東維拉唔敢輕率搶攻，喺冇得揀嘅情況下都要先求穩守，預計入球唔會多，博2.5球入球細係明智之選。（Now 621及611周日凌晨1時30分直播）
阿仙奴最近有布卡約沙卡同加比爾捷西斯先後重傷，進攻力量大幅削弱，生波製造嘅入球少之又少，單靠角球戰術入波唔係長遠辦法。上場贏熱刺2比1，最後要用埋「雪櫃兵」基蘭泰亞尼出嚟客串翼鋒，就知「兵工廠」鋒線人手有幾短缺，想谷都有心無力，佢哋近4場比賽有3場總入球開2球或以下，今場都唔會有太大轉變。
阿士東維拉近況有起色，上場1比0小勝愛華頓後，各項賽事錄得3連勝，今場作客會用最擅長嘅穩守突擊去作戰。雙方都唔想畀對手有反擊空間，今場會防守為先，睇番兩隊近3次對賽都好緊湊，總入球都係2球或以下，今仗一於再追2.5球入球細。
更多賠率：
