彈出彈入　拜仁接近同艾方素續約4年

拜仁慕尼黑左後衞艾方素戴維斯將於今夏約滿，續約問題出現多次變化，根據《The Athletic》最新爆料，雙方已接近達成協議，呢位24歲加拿大國腳有望續約4年，令皇馬想免費簽入艾方素戴維斯嘅美夢幻滅。

據悉拜仁慕尼黑向艾方素戴維斯開出新續約待遇，將佢嘅人工由現時1,100萬歐元年薪，增加至1,500萬歐元(約1.2億港元)年薪，並會有一筆簽字費，令呢位「帶刀侍衞」心動，傾向繼續效力呢支德甲班霸。

艾方素戴維斯2018年由美職球隊溫哥華白帽加盟拜仁，迅速奠定主力位置，踢法瞻前顧後，今季德甲15次上陣入1球及2次助攻，教練高柏尼極力挽留佢，會方亦唔想佢自由身走人，導致人財兩失，不惜開出高薪綁實艾方素戴維斯。

皇馬4年前免轉會費簽入當時約滿嘅拜仁後衞阿拉巴，今次想照辦煮碗簽艾方素戴維斯，恐怕如意算盤打唔響。