基爾獲加隨時離開曼城　願減薪投AC米蘭

今夏同曼城約滿嘅基爾獲加，近日同意同「藍月亮」提前解約，今個冬季轉會窗離隊，下一站據報係AC米蘭。基爾獲加同AC米蘭正進行最後談判，同意大幅減薪轉會，現時關鍵係曼城收取多少轉會費，又或免費放人。

基爾獲加早前被爆出軌，已獲妻子原諒，雙方決定離開英國，轉到意大利展開新生活，所以急住離隊，基爾獲加更不惜大幅減薪，由原本喺曼城獲得1,100萬歐元年薪，到AC米蘭減到得番400萬歐元。(約8,800萬至3,200萬港元)

由於合約今夏到期，曼城唔會阻止34歲嘅基爾獲加離隊，不過仲未決定畀係免費離隊，定係收取轉會費。

哥迪奧拿日前證實基爾獲加離隊消息，甚至就此結束球員生涯，除咗AC米蘭，曼城更收到來自沙特同皇馬嘅報價。