利物浦接觸甘美治　今夏免費簽

拜仁慕尼黑中場甘美治今夏約滿，即將離隊，今個冬窗可以同其他球隊傾轉會，據報利物浦近日同甘美治進行非正式談判，準備今夏免費簽入。

29歲嘅甘美治效力拜仁第10季，上陣416場入43球，贏過8次德甲、1次歐聯同1次世冠盃，同拜仁續約一直傾唔成，拜仁今季由高柏尼執教，甘美治繼續受重用，今季上陣26場全部正選，交出1入球6助攻。

甘美治曾表示，一旦離開拜仁，只會轉投歐洲5大豪門，分別係曼城、利物浦、阿仙奴、皇馬同巴塞，利物浦正係佢心儀球隊之一。

甘美治未能同拜仁續約原因複雜，其中一個原因係薪酬過高，周薪28萬鎊(約260萬港元)，會方希望佢減薪續約，甘美治梗係睬你都傻，依家同利物浦接觸，相信紅軍可滿足佢要求。