三笘薰威水！成英超史上最強日本球員

白禮頓喺英超作客3比1打爆曼聯，最搶鏡球員非三笘薰莫屬，呢位日本翼鋒交出1入波同1助攻後，正式成為英超史上入波最多嘅日本球員，領隊靴斯拿賽後大讚佢係「全能攻擊手」。

三笘薰今季有5入波同3助攻，對曼聯嘅入球係佢喺英超累積第15球，打破前李斯特城前鋒岡崎慎司保持嘅14球紀錄；三笘薰喺英超有12次助攻，同樣係日本人No.1，遠遠拋離香川真司同稻本潤一(各6次)。

亞洲球員嚟講，三笘薰目前排英超史上第4位，今季有機會超越第3位嘅南韓前鋒朴智星(19球)，頭兩名係南韓孖寶孫興民(126球)同黃喜燦(22球)。

白禮頓教練靴斯拿賽後大讚：「三笘薰嘅入楔速度同時間好好，佢係個全能球員，速度高、單對單好好、識得入波，又能夠喺狹窄空間同短時間內製造機會，我好開心可以同佢合作。」