【官宣】沙夏登陸美職　投夏洛特FC

美職球會夏洛特FC周三(22日)宣布，球會成功向加拉塔沙雷借用韋費特沙夏，借用期去到明年1月，而且有權延長借用多半年，將成球隊王牌球星。

2022年先進陣美職嘅夏洛特FC，上季喺前李斯特城、維拉領隊甸恩史密夫帶領下殺入季後賽，今季就「加碼」衝刺，動用其中一個「國際球員」名額引入韋費特沙夏。

32歲嘅韋費特沙夏曾效力曼聯、水晶宮等球會，曾被視為英超最佳翼鋒之一，今季被加拉塔沙雷外借去里昂，但苦無上陣機會，今次登陸美職有望展開新一頁。

夏洛特FC總經理卡尼達表示：「沙夏係世界級球員，入波同創造機會都係精英級別，佢喺英超已經證明咗，我相信佢可以喺美職發揮影響力，用佢嘅魔法幫球隊贏波。」