摩連奴出手　費倫巴治借入PSG中堅

由葡萄牙名帥摩連奴執教嘅費倫巴治喺轉會市場有重要收穫，成功向巴黎聖日耳門(PSG)借用中堅史堅尼亞，直至今季結束，提升爭標本錢。

費倫巴治借用史堅尼亞半年，並包含買斷條款，呢位29歲斯洛伐克國腳曾於2017至2023年效力國際米蘭，協助球隊奪得1次意甲及2次意大利盃冠軍，並打入過歐霸盃及歐聯決賽，但都屈居亞軍。

史堅尼亞原本係國米主力，但拒絕續約，2023年夏天以自由身轉投PSG，獲得高薪合約，被國米球迷批評「貪錢」。

史堅尼亞入「門」後不獲重用，上季法甲僅上陣24次，今季更加只有5次披甲，早已傳出佢可能走人。費倫巴治現時排土超第2位，落後榜首加拉塔沙雷6分，史堅尼亞加盟後，有助增強防線實力。