狼隊好事成雙　贏波+根夏續約

狼隊蛇年好事成雙，喺周日(2日)凌晨英超主場以2比0擊敗阿士東維拉，獲得護級寶貴3分，並且成功同入波功臣馬菲奧斯根夏續約至2029年6月，粉碎呢位25歲巴西射手離隊傳聞，可穩定軍心，專注踢好今季餘下護級戰。

狼隊遇上歐聯16強份子阿士東維拉，毫無懼色，並且主動出擊，開賽12分鐘，憑中場比拿加迪入波打開紀錄。狼隊攻勢一浪接一浪，馬菲奧斯根夏單刀起腳，被維拉門將達米安馬天尼斯撲出，干卡路古亞迪斯2次起腳，都錯失入波良機。

維拉新兵唐耶爾馬倫曾經近門射入，但因為越位食詐胡。戰至補時，馬菲奧斯根為狼隊射成2比0完場，領先尾三李斯特城2分。

馬菲奧斯根夏今季英超已經11球進帳，近期曾傳出阿仙奴、曼聯、熱刺等大球會有意收購呢位巴西國腳，狼隊現時成功說服佢續約，清除一大不明朗因素。