費倫天拿轉會大豐收　柏拿甸奴打造本土班底

費倫天拿今季喺意甲成績突出，冬季轉會窗亦非常活躍，「閂窗」前1日連簽3位本土球星，尼高路法基奧利、尼高路辛尼奧路同安杜亞相繼來投，教練柏拿甸奴都話非常滿意。

「紫百合」喺轉會市場雄心勃勃，分別由加拉塔沙雷同祖雲達斯借用辛尼奧路同法基奧利兩位意大利國腳，又用500萬歐元羅致巴黎聖日耳門嘅安杜亞，呢位20歲小將係意大利U21主力，實力大大提升。

費倫喺季前簽入意大利前鋒摩斯堅恩，表現大獲好評，教練柏拿甸奴志切打造「本土班底」，最重要係意大利球員唔需要花時間適應，可以即刻為球隊出力，挑戰意甲前4席位。

柏拿甸奴表示：「球會職員24小時不停工作，令轉會得到大成功，好多新兵本身已經認識，唔需要用太多時間磨合，至於技術上嘅融入係我嘅責任。我哋簽入幾個高質球員，嚟緊比賽會有更多唔同踢法。」