曼聯準備大清洗　艾摩廉只留兩人

曼聯今季成績令人失望，根據英國《曼徹斯特晚報》爆料，領隊魯賓艾摩廉計劃今夏大清洗，將會出售多位球員，籌集資金收購符合自己戰術需要嘅新兵，據悉呢位葡萄牙名帥只會留用2位同胞般奴費南迪斯、達洛治。

英國傳媒指魯賓艾摩廉接手執教曼聯3個月以來，刻意同球員保持距離，唔想建立任何友情，皆因佢早已計劃進行1場「無情清洗」。歸根究底由於前曼聯主帥坦哈格上年夏天豪花2億鎊收購5位球員後，會方難以再「開水喉」買人，所以艾摩廉必須先出售現有球員，先至有資金簽入心頭好。

魯賓艾摩廉上月承認，自己唔會同球員建立密切關係，似乎唔想受私人感情影響買賣球員決定。英國傳媒指艾摩廉現時只係同般奴費南迪斯、達洛治屬於「朋友關係」，一般估計就算佢進行大清洗，呢2位葡萄牙國腳應該都可以留低。