車仔沉淪都收貨　米基爾18個粗口送馬利斯卡

車路士今季喺馬利斯卡帶領下，一度回復昔日霸氣，不過最近又打回原形，近9場聯賽只得2場勝仗。領隊馬利斯卡喺上場吞白禮頓3蛋後，死撐車路士今季成績已「超乎預期」，話球會畀佢兩年時間重返歐聯，依家仍然有機會爭入前4應該「收貨」。

前車路士球星約翰米基爾，對於馬利斯卡嘅言論就非常憤怒，日前喺自己網上節目入面，用18個「Fxxk」怒轟馬利斯卡：「邊X個同佢講2年返歐聯？咪X講笑，呢隊係車路士嚟！乜X嘢超乎預期？車路士係歐聯級球會，我發誓未X睇過歐協聯，完全唔在乎呢個比賽。」

季初車路士踢到風生水起，馬利斯卡就不斷自稱「無力爭標」，米基爾就話：「馬利斯卡一直強調車路士唔係爭標份子，我相信球員都畀佢影響到，自此之後車仔嘅表現就係災難，馬利斯卡完全唔X知自己做緊乜！」