坦哈格繼承家族生意　唔排除提早「掛鞭」

荷蘭教練坦哈格上年被曼聯炒魷後，至今仍然賦閒在家，日前佢表示最快會等到夏天先至落班，不過呢位55歲「冠軍教頭」最近自爆繼承家業，唔排除會選擇喺商界發展，提前結束執教生涯。

坦哈格接受荷蘭網上節目《SEG Stories》訪問，自爆未來發展方向：「我唔知我未來事業發展係點，但肯定會盡最大努力，我要揀合適自己嘅事業，有好多嘢可以揀，喺足球可能係領隊以外嘅位置，又或者進入完全唔同嘅領域，最近我就幫我兄弟嘅公司做嘢，我爸爸亦有一間公司，我都好有興趣參與，依家我有好多時間去幫手，一樣充滿樂趣。」

據報坦哈格爸爸軒尼喺荷蘭經營一間房地產公司，而佢兄弟米高同歷高就擁有幾間財務公司，坦哈格更係其中一個嘅老細之一。報道指軒尼當年曾經游說坦哈格放棄足球，幫手打理家族生意，不過被坦哈格拒絕。