祖雲達斯意盃出局　莫達面臨炒魷

周四(27日)凌晨意盃8強出現冷門賽果，祖雲達斯喺主場同安玻里踢成1比1，最後互射12碼慘被淘汰，1星期內接連喺歐聯同意盃出局，據報教練莫達嘅帥位岌岌可危，球會高層正考慮夏天換帥。

祖雲達斯主場對住3個月不勝嘅安玻里，估唔到踢得咁狼狽，上半場先落後0比1，雖然卡夫蘭杜林66分鐘追平，但之後無以為繼，最後互射12碼有杜辛華荷域同基倫耶迪斯宴客，射輸2比4出局。

教練莫達賽後嬲爆表示：「冇咩好解釋，完全係我嘅責任，睇到呢場表現令我羞恥，希望球員都有呢個感受。我哋依家要埋頭苦幹準備下一場比賽，着到祖雲達斯波衫就要交出100%努力。」

據《都靈體育報》報道，祖雲達斯高層首次商討夏天換帥可能性，尤其喺歐聯同意盃都出局之後，如果保唔住下屆歐聯資格，莫達就會落鑊。祖記依家排意甲第4位，但只比第5嘅拉素多2分。