多蒙特成績盈利雙倒退　少收5.7億

多蒙特近日發表半季報告，利潤及銷售額大幅下降，由去年7,800萬歐元大幅縮減至800萬歐元，足足蒸發咗7,000萬歐元(約5.7億港元)盈利，認真大鑊。

呢支德甲「蜜蜂兵團」今季成績大倒退，聯賽跌至第10位，季中曾經換帥又洗一筆，最近委任尼高高華領軍，德國盃亦已出局，唯一安慰係歐聯打入16強，而且籤運唔錯，將會同里爾爭入8強。

不過對於多蒙特嚟講，成績只係次要，最重要係財政收入，分析指佢哋今季盈利倒退主要原因係轉會交易頻頻碰壁，隊中主力賣唔到好價錢，相比起2023年佢哋出售祖迪比寧咸去皇馬，總共收到1.03億歐元巨額收入，今季可以話生意淡薄。

嚟緊多蒙特求神拜佛，要喺季尾打番上去，爭取歐聯或歐洲賽資格，否則來季收入將會進一步萎縮。