拜仁取消甘美治新約 利物浦等執筍貨
拜仁慕尼黑同德國國腳甘美治嘅續約談判拉鋸多時，原本以為續約只係時間問題，不過德國《圖片報》報道，拜仁對於甘美治遲遲唔簽約表示不滿，近日更取消已開出嘅合約，令甘美治約滿離隊機會大大增加。
《圖片報》消息指，拜仁周一(24日)曾舉行高層會議，對於甘美治一直唔答應球會開出嘅新約，球會決定唔再無限期等待，通知甘美治已經取消開出嘅合約，意味呢位30歲球星將喺夏天回復自由身，結束10年拜仁生涯。
唔少豪門都吼住甘美治，其中英超「1哥」利物浦就最大機會，施洛希望佢可以代替約滿嘅阿歷山大阿諾特，同時亦可以勝任「6號位」，分擔賴恩格雲貝治嘅壓力，所以被利物浦視為增兵頭號目標。