拉舒福特願長留維拉　曼聯可收回3.9億

拉舒福特今個冬窗外借到阿士東維拉，原本只屬過度性質，拉舒福特嘅目標係借維拉做跳板轉投巴塞隆拿，據報佢近日改變主意，同身邊人表示願意長留維拉，以增加重返英格蘭國家隊參加世界盃機會。

英國傳媒報道，27歲嘅拉舒福特轉投維拉後表現復甦，擊敗車路士一仗送出兩個助攻，平日操練亦回復朝氣，「福仔」向身邊友人表示，維拉主帥艾美利係幫佢重返高峰嘅合適人選，因此改變主意，願意長留維拉。

根據外借協定，維拉有權在今年夏天以4,000萬鎊(約3.9億港元)轉會費買斷拉舒福特，曼聯將會收回資金後再增兵。

不過維拉會否收購「福仔」存在疑問，主要障礙係佢嘅超高薪酬，周薪高達32.5萬鎊(約318萬港元)，而維拉現時頂薪球員亦只係15萬鎊，所以如果拉舒福特想留低，就必須要接受減薪。