C朗變敗家仔　艾納斯1.15倍客W大熱倒灶輸波

周六(1日)凌晨沙特阿拉伯職業聯賽爆大冷，擁有C朗等多位球星助陣嘅艾納斯作客1比2不敵艾奧魯巴，1.15倍客W大熱倒灶。身為首席射手嘅C朗今仗8次射門只有1次中目標，並錯失1次重大入波機會，變成敗家仔。

論整體實力、聯賽排名、星味，艾奧魯巴都差一大截，但今場有出色發揮，踢到40分鐘先開紀錄。換邊後冇耐，艾納斯由後備上陣嘅布華殊入波扳平，戰至65分鐘，艾奧魯巴憑曾經效力般尼嘅冰島國腳古蒙特臣攻入致勝1球，爆出10倍主W。

C朗上場聯賽入1球，但今仗腳頭無靈，8次射門只有1次中目標，2次嘗試扭過對手都失敗，仲有9次失去控球權，表現令人失望。艾納斯近3場聯賽輸2場，落後榜首伊蒂哈德9分，兼踢多1場，爭標機會渺茫。

另外，前列大戰，吉達艾阿里作客以3比2擊敗第2位希拉爾，艾雲東尼上演「帽子戲法」包辦3個入波。希拉爾輸波之後，落後榜首伊蒂哈德5分，兼踢多1場，伊蒂哈德捧盃機會愈來愈大。