加拿祖發脾氣之迷解開　已遭「暖心處罰」

曼聯上場英超3比2擊敗葉士域治，翼鋒阿歷真度加拿祖疑似不滿被換走，嬲爆直接返入更衣室，令人質疑呢位阿根廷國腳毫無紀律及團隊精神。不過，曼聯出戰下周一(3日)凌晨英足盃對富咸前夕，領隊魯賓艾摩廉出來解畫，話加拿祖當時只係入更衣室換衫，並非發脾氣，佢已遭到「處罰」，就係請隊友食晚餐。

艾摩廉再次被傳媒問到加拿祖發脾氣一事，佢話：「事件好有趣，我經過了解後，原來加拿祖係入更衣室換衫，因為比賽期間落雨，佢全身濕透，雖然佢冇返回後備席，但仍然留喺球場內睇波，直至比賽結束先至離開，其實只係小事一樁，但由於曼聯係大球會，任何細節都好重要，加拿祖請隊友食晚餐作為賠罪，佢仲年輕，會繼續學習，最重要係佢有同我講番來龍去脈。」

艾摩廉曾經多次指責拉舒福特態度有問題，所以冬季轉會窗將佢外借，一度令人擔心加拿祖會步「福仔」後塵，幸好只係一場誤會。