曼城有救！洛迪復操有望季尾上陣

曼城有好消息，自從上年9月受傷一直缺陣嘅中場洛迪卡斯簡迪，康復進度良好，近日已經復操，有望季尾復出，成為「藍月亮」爭入英超前4位，甚至衝冠嘅救星。

洛迪卡斯簡迪上年9月英超對阿仙奴，整傷右腳膝部十字韌帶，一度傳出可能提收咧，幸好呢位28歲西班牙國腳康復比預期快，「藍月亮」官方近日發布片段，證實洛迪卡斯簡迪可以完成個人操練。

領隊哥迪奧拿話：「現時對於洛迪而言，最重要係康復，是否復出比賽，仍然需要觀察。」其實哥帥早已認為洛迪今季仍有望披甲，並將佢加入歐聯淘汰賽名單，可惜球隊不敵皇馬出局。

雖然曼城今季英超爭標機會渺茫，但仍然要力爭打入前4位奪取下屆歐聯入場券，以及爭奪英足盃錦標，如果季尾有「不敗之男」洛迪卡斯簡迪幫手，可以大大提升達成目標機會。