紐卡素輸波哥頓食紅牌 無緣英聯盃決賽
紐卡素喺周日(2日)英足盃第5圈，主場1比2輸畀白禮頓，無緣晉級8強。相比起出局，安東尼哥頓衝動打人食紅牌就更大件事！事關佢按例將會停賽3場，錯過今個月中對利物浦嘅英聯盃決賽。
紐卡素22分鐘由阿歷山大伊沙克射入12碼領先，但完半場前被恩古巴明泰扳平。踢到83分鐘，安東尼哥頓同雲赫基鬥搶爭輸，安東尼哥頓疑不滿對方拉衫，即「雙龍出海」打落對方面部，結果被逐離場。
白禮頓喺補時亦有蘭普堤兩黃一紅被逐，加時戰10個對10個之下，白禮頓由韋碧克喺114分鐘突破越位射入致勝球，帶領白禮頓贏2比1。由於安東尼哥頓嘅紅牌屬暴力犯規，按例會停賽3場。
紐卡素領隊艾迪侯域賽後表示：「我睇唔到哥頓當時嘅意圖，但以我對佢嘅認識，佢肯定佢唔係有心傷人。老實講，我原本冇為意佢會喺(英聯盃)決賽停賽，如果係真就更加失望，我哋會再分析事件，保留上訴嘅權利。」