艾摩廉豪言贏英超被轟「天真」　寸嘴挑機朗尼

曼聯喺英足盃出局，今季捧盃最後希望只剩歐霸盃，不過領隊魯賓艾摩廉就做「志氣哥」，表明贏英超冠軍先係曼聯最大目標，但呢番豪氣言論就被名宿朗尼批評係「天真」，引發艾摩廉寸嘴反擊。

艾摩廉喺英足盃對富咸賽前表示：「我知道曼聯今季經常輸波，不過終極目標係然係英超冠軍，我唔知要幾長時間先可以實現，但球隊定咗目標，就會排除萬難向目標進發。」

呢番言論夠晒雄心壯志，不過朗尼聽完就覺反感：「佢話要贏英超？點贏？依家目標應該係向上爬，現階段話目標係英超冠軍好天真，因為曼聯依家距離英超冠軍仲差十萬九千里咁遠。」

艾摩廉隨後寸嘴反擊：「如果話今季會贏，或者下季做英超大熱，咁先至叫天真。我掛靴嗰陣都試過講波，真係好容易做！我並唔天真，或者呢個係我40歲就做曼聯領隊嘅原因！」