阿仙奴有新目標　睇中馬體會小將

阿仙奴轉會名單上有新名字，據報係馬體會小將柏保路巴里奧斯，被視為斟介蘇比文迪一旦觸礁後嘅plan B方案。

阿仙奴一直希望簽入皇家蘇斯達中場大將蘇比文迪，但斟介進展遲緩，而且對方身價不菲，據報轉會費高達8,250萬鎊(約8.1億港元)，成事機會大打折扣，因此「兵工廠」可能改變目標，斟介馬體會小將柏保路巴里奧斯。

21歲嘅巴里奧斯係馬體會青訓產品，2022年獲提拔上一隊至今，已累積3季西甲經驗，上陣88場入3球5助攻，亦係去年巴黎奧運西班牙男足金牌成員，並於去年底入選大國腳。

巴里奧斯現時身價估計為5,000萬歐元(約4億港元)，只及蘇比文迪一半，但發展潛力更勝一籌，阿仙奴轉移目標相當合理。