阿迪達成功「拆彈」　但傷咗新星心靈

阿仙奴喺歐聯16強首回合作客大勝燕豪芬7比1，領隊阿迪達作出一次罕見調動，35分鐘就換走貢獻助攻嘅利維斯史基利，防止呢位有黃牌在身嘅18歲新星再次被逐。雖然阿迪達成功「拆彈」，但難免傷咗利維斯史基利嘅心靈。

阿仙奴今場第2個入波，全靠兩位小將完美合作，由18歲嘅利維斯史基利傳畀17歲嘅尼華尼利射入。兵工廠領先3比0後，阿迪達突然用卡拉費奧利入替利維斯史基利，但並非佢受傷，或者表現差，而係因為呢位左後衞踢到24分鐘已拎咗黃牌，加上之後又做出粗野犯規，擔心佢又魯莽被逐。

利維斯史基利喺1月英超對狼隊，以及上月對韋斯咸，都被球證出示紅牌趕出場，阿迪達今次學精咗提早「拆彈」，亦無可厚非。

不過，利維斯史基利離場時明顯非常失望，睇來佢未來比賽真係收斂一下犯規動作。至於入替利維斯史基利嘅卡拉費奧利射入1球及1次助攻，有機會搶走利維斯史基利嘅正選位置。