忍夠奧拿拿　曼聯關注皇馬2號龍

曼聯門將奧拿拿長期不穩，嚴重影響球隊成績，據報會方今夏打算物色新門將，並開始關注皇馬2號守門員盧連情況，皇馬方面對於出售盧連並不抗拒，只要收到合適價錢，就會放人。

西班牙傳媒報道，26歲嘅盧連成為曼聯收購目標之一，皇馬上季在泰拔高圖爾斯長期養傷下，盧連獲不少上陣機會，更係歐聯奪冠功臣，不過今季泰拔高圖爾斯傷愈復出，盧連返回後備席，今季僅上陣9次。

其實曼聯仲有個後備門將比恩迪亞，但甚少上陣，據報佢為入選世界盃大軍，將會要求今夏轉會，而且奧拿拿下季中要出席非國盃而缺席數星期，所以收購新門將係有實際需要。

報道指曼聯準備為盧連提供1號球衣，超級經理人文迪斯亦會發功促成交易，如果曼聯願意提出2,000萬歐元報價(約1.68億港元)，皇馬就會放人。