艾利臣夏天離隊？利物浦有幸福的煩惱

利物浦門將艾利臣比加喺歐聯16強交出驚天表現，獲領隊施洛大讚係「世一」門將，不過呢位32歲老將被傳將喺夏天被賣走，「讓位」畀即將加盟嘅新世代門神馬馬達舒維尼，「紅軍」點樣選擇令人關注。

艾利臣同利物浦合約到2027年完結，「紅軍」上年提前用3,500萬歐元簽入格魯吉亞門將馬馬達舒維尼，就係為接班做準備。艾利臣上年曾獲沙特豪門斟介，佢亦承認開價非常吸引，但最後覺得「未係時候」而繼續留低。

前利物浦球星馬克羅蘭遜表示：「我預計艾利臣夏天會走，利物浪買馬馬達舒維尼就係代替佢，艾利臣已經32歲，佢想喺退休前簽埋最後一份大合約，利物浦亦可以喺最後機會賺到轉會費，係一個三贏嘅交易。」

不過，著名記者Bailey就透露，利物浦仍未決定點樣做，如果繼續留用艾利臣嘅話，就會將馬馬達舒維尼再外借出去1季。