明奈拒絕續約　計劃轉戰其他聯賽

曼聯同中場新星明奈續約談判瀕臨破裂，根據英國《衞報》爆料，呢位19歲英格蘭國腳拒絕續約，並準備轉投其他聯賽球隊。紅魔鬼亦打定輸波，只要有球會出到7,000萬鎊(約7億港元)轉會費，就可以帶走明奈。

明奈屬於曼聯青訓產品，近年有出色表現，但周薪只有2萬鎊，遠低於其他主力，甚至僅及被外借去貝迪斯嘅安東尼馬菲奧斯嘅十份一人工。明奈仲有2年合約在身，據悉要求加人工至18萬鎊周薪，先至肯續約。

不過，曼聯班主拉特克利夫正在大力削減球會開支，對於明奈要求嘅薪酬有所保留。早前英國《每日郵報》指曼聯重新開始同明奈傾續約，根據《衞報》最新消息指，明奈已無意再談判，並希望轉會，為免將來同曼聯打對台，佢計劃去其他聯賽搵食。

曼聯近年離隊嘅球員多數去意甲或者西甲，並且往往獲得重生，但可以滿足到紅魔鬼7,000萬鎊轉會費要求嘅買家，恐怕並唔多。明奈今季為曼聯上陣25場入1球，佢自從2月初英足盃對李斯特城一役受傷後，已經缺陣1個月，仍然復出無期，可能影響轉會交易。