曼聯爆逃亡潮　8位球星或一齊離隊

曼聯近年成績每況愈下，今季聯賽更加淪落至排第14位，球隊表現長期遭外界批評，令唔少球員感到意興闌珊，希望離隊拯救足球事業，預料有8位球員可能今夏走人。

2位中場老將卡斯米路、基斯甸艾歷臣及後衞域陀連迪路夫最大機會今夏離隊，尤其是卡斯米路周薪高達37.5萬鎊(約375萬港元)，屬於隊內「打工皇帝」，但表現同人工不符，會方早已打算放走呢位33歲巴西球星，佢可能去沙特阿拉伯搵食。

至於2位前鋒海倫、約舒亞舒克斯成「魔」以來，一直表現令人失望，盛傳佢哋希望重返意甲，祖雲達斯有興趣接貨。至於經常受傷嘅「傳奇7號」美臣蒙特，獲得另一支意甲勁旅國際米蘭垂青。

另外，副選門將比恩迪亞由於苦無上陣機會，亦準備走人，加上明奈計劃轉戰其他聯賽，換言之，有8位曼聯球員可能今夏離隊，紅魔鬼無可避免需要重建陣容。