C朗入波創另類紀錄　但艾納斯又失分

周六(8日)凌晨沙特阿拉伯職業聯賽，葡萄牙巨星C朗射入1球，獲得職業生涯第926個入波，剛好一半係30歲之後射入，可見呢位40歲老將長年保持高水平發揮。不過，C朗效力嘅艾納斯主場出擊，最終被艾沙比逼和2比2。

今場戰局峰迴路轉，艾沙比喺44分鐘獲得12碼打開紀錄，艾納斯上半場補時連入2球，並且都同C朗有關，首先佢窄角度主射罰球，被對方球員擋出後，隊友艾曼耶亞第一時間勁射入網扳平。

跟住C朗自己都入番1球，協助艾納斯迅速反超前，換邊之後，艾沙比靠1次角球攻勢逼和2比2。艾納斯近2場聯賽只有1和1負，落後榜首伊蒂哈德10分，爭標機會非常渺茫。

雖然艾納斯又失分，但C朗仍然當選今場最佳球員，根據統計，佢30歲後各項賽事累積入463球，剛好等於30歲前嘅入波數字，可見C朗嘅入球能力並冇因為年紀增長而減弱。