PSG大勝雷恩　迪比利起孖創50年紀錄　

周日(9日)凌晨法甲，巴黎聖日耳門(PSG)作客大勝雷恩4比1，翼鋒奧士文尼迪比利補時連入2球，佢踏入2025年後，各項正式賽事已有20球進帳，成為近50年以來第1位開年首3個月入波「20+」法甲球員。

巴黎聖日耳門上周中歐聯16強首回合主場0比1不敵利物浦，嚟緊周三(12日)凌晨要踢次回合生死戰，教練安歷基今場正選陣容收起多位主力，但仍然夠殺，由巴特利巴高拿、干卡路拉莫斯各入1球，一度領先2比0。

戰至53分鐘雷恩靠中堅巴斯拿建功追至1比2，安歷基見唔對路，換入奧士文尼迪比利等主力，效果立竿見影，迪比利喺補時梅開二度，奠定4比1勝局。

奧士文尼迪比利今季為PSG各項賽事上陣35場入28球，其中20球係今年射入，表現如有神助，PSG下場歐聯16強次回合作客能否反勝利物浦，就要睇呢位法國國腳演出。